Māui Auaha:

He matakite a Māui. He wawata ōna, ā, i tutuki i a ia ētahi whāinga kīhai te tangata i whakapono, kia pai ake te noho, kia tōnui ake te mahi mō te tangata. E noho ki te whakaaro i ngā āhuatanga e hiahiatia ana hei āpōpō. Ko whea koe hei te 10 tau e tū nei? He aha te āhua o tō ao hei te paunga o te 20 tau?

Hei whakaohooho, hei whakarite i tō ara kia tutuki ō wawata, ō whāinga mō tō oranga, ko te whakatakoto moemoeā. Ka āwhina ki te whakaahua mai i ō pūmanawa, i ō pūkenga, i tō pitomata. Mā te moemoeā e āwhina ki te whakakipakipa i a koe kia ekengia ō whāinga.

Kei te whakatauākī, ‘Me ka moemoeā au, ko au anake; me ka moemoeā tātou, ka taea e tātou’. Hei tā Te Puea Hērangi kia maumahara tātou ki te hirahira o te moemoeā tahi kia hua te katoa, kaua te takitahi.

Tērā tētahi taputapu hei āwhina i a koe ki te whakaahua mai i ō whāinga, i ō manako, ā, ko te papa moemoeā tēnā. He pai ki te hinengaro ngā ataata hei whakaatu i ō whāinga kia hihiko te ngākau, ā, ka āwhina kia ū koe ki ō whāinga ā tutuki noa.