He tirohanga
E hāngai pū ana tēnei rauemi ki te marau Pāngarau o te marautanga TMOA hou, ā, he mea hoahoa kia whaitake te pānga ki te hōtaka pāngarau whānui.
Ka whakamahi ngā mokopuna i ngā kaupapa me te mātauranga pāngarau nō Tūārere 3 me te Tūārere 4 o te wāhanga ako o te Pāngarau ki te whakaoti i ngā rapanga huhua. Ka nanao atu ngā akoranga ki ngā ariā motuhake nō Te Tātai, me ngā hononga āpiti ki Te Taurangi me te Āhuahanga, Te Tauanga me te Tūponotanga, me Te Ine.
Ka tautoko ēnei ngohe i ngā mokopuna ki te tuitui hononga motuhenga i waenga i tō rātou mātauranga pāngarau me te mātau ā-ahumoni. Ka āwhina i a rātou ki te whakamahi i tā rātou i mōhio ai o te pāngarau ki ngā āhuatanga ao tūturu, e whakaatu ana hoki i te whai tikanga me te whaikiko o te pāngarau i waho ake o te akomanga.
Puka ākonga:
Ka whakarato ngohe takitahi, ā-rōpū hoki tēnei rauemi pāngarau e ako ai ngā ākonga i ētahi atu mātauranga mō te moni.
E ono ngā kaupapa mātau ahumoni e arohia ana i tēnei pukapuka a te ākonga:
- Te Kaupapa 1: Te Whakamahere Pūtea me te Utu i ngā Nama
- Te Kaupapa 2: Ngā Puka Utu me te Tāke
- Te Kaupapa 3: Te Whakahaere i Tāu ake Pakihi
- Te Kaupapa 4: Te Pūtea Taurewa
- Te Kaupapa 5: Te Whakatānga
- Te Kaupapa 6: Ngā Whakapaunga Moni a te Kāwanatanga
Te aratohu pouako:
Ka ārahi tēnei puka i te whakaakoranga o tēnei rauemi ki ngā ākonga o te Tau 8, 9 me te 10 me ngā whakaarotanga ako, te tiarotanga me te tirohanga whānui o ngā whenu pāngarau hāngai. Ka whakatakoto i ngā hononga ki ngā rauemi tāpiri hei tautoko, hei whakapūmau i ngā ariā taketake i te pāngarau, inakoa rā i roto i te whenu o Te Tātai.
Ngā ataata mā ngā kaiako
E tautoko ana ēnei ataata e toru i te whakatinanatanga o ngā mātauranga ahumoni hei wāhanga mō tētahi hōtaka Pāngarau i ngā Tau 9 – 10 o te kura. Ko te aronga matua, ko te āwhina i te kaiako kia mārama, kia māia hoki ia ki te whakamahi i Te Tātai Ahumoni me Ngā Rauemi Tāke (Te Whai Tāke, Kia Tika!).
I te roanga atu o ēnei ataata, ka whakaaturia ētahi huarahi me ētahi rautaki e ngahau ai te whakaako i ngā kaupapa ahumoni. Ka tūhuratia hoki te whakamahinga o ēnei rautaki mā roto mai i ngā kōrero me ngā ngohe o Te Tātai Ahumoni me Ngā Rauemi Tāke.
Ko ngā kaupapa whānui o ngā ataata e toru, ko ēnei:
- Te Whakaako i te Pāngarau o te Ahumoni – (Teaching Financial Maths)
- Te Tautoko i te Reo Matatini me te Whiringa Hirikapo – (Supporting Literacy and Metacognition)
- Te Whakawhanake i te Reo Matatini me te Māramatanga ki te Tāke– (Building Literacy and Understanding Tax)