Ngā Ataata e Tautoko Ana i ngā Kaiako Pāngarau
E tautoko ana ēnei ataata e toru i te whakatinanatanga o ngā mātauranga ahumoni hei wāhanga mō tētahi hōtaka Pāngarau i ngā Tau 9 – 10 o te kura. Ko te aronga matua, ko te āwhina i te kaiako kia mārama, kia māia hoki ia ki te whakamahi i Te Tātai Ahumoni me Ngā Rauemi Tāke (Te Whai Tāke, Kia Tika!).
I te roanga atu o ēnei ataata, ka whakaaturia ētahi huarahi me ētahi rautaki e ngahau ai te whakaako i ngā kaupapa ahumoni. Ka tūhuratia hoki te whakamahinga o ēnei rautaki mā roto mai i ngā kōrero me ngā ngohe o Te Tātai Ahumoni me Ngā Rauemi Tāke.
Ko ngā kaupapa whānui o ngā ataata e toru, ko ēnei:
Te Whakaako i te Pāngarau o te Ahumoni – (Teaching Financial Maths)
E aro ana tēnei ataata ki ngā rautaki whakaako e tautoko ana i te mokopuna ki te whakamahi i te pāngarau o te ahumoni i ngā horopaki o ia rā. Ko ngā rautaki whakaako e whā ka arohia, ko Te Tūhonohono, ko Te Mahi Whakamuri, ko Te Kimi i te Hapa, me Te Whakamahi i ngā Taputapu Ataata.
E tautoko ana tēnei kiriata i te whakaakona o Te Tātai Ahumoni.
Te Tautoko i te Reo Matatini me te Whiringa Hirikapo - (Supporting Literacy and Metacognition)
I tēnei ataata, ka arohia te whanaketanga o ngā pūkenga reo matatini me ngā pūkenga whiringa hirikapo o te mokopuna. E toru ngā rautaki ako ka arohia, arā, ko Te Whakaaro – Te Mahi Tahi – Te Whakaatu, ko Te Waihanga a te Mokopuna i Āna ake Pātai, me Te Māka a te Mokopuna i ngā Whakautu a Tētahi atu.
E tautoko ana tēnei kiriata i te whakaakona o Te Tātai Ahumoni me Te Whai Tāke, Kia Tika!
Te Whakawhanake i te Reo Matatini me te Māramatanga ki te Tāke – (Building Literacy and Understanding Tax)
E tautoko ana tēnei ataata i te kaiako ki te whakamahi i ētahi rautaki whakaako e whā hei āwhina i te mokopuna ki te ako i ngā ariā tāke. Ko ngā rautaki e arohia ana i tēnei kiriata, ko Te Kupu Tīrangorango, ko Te Tuhi Ngātahi, ko Te Oma ki te Tiki Kōrero, me Te Rangahau Panga.
E tautoko ana tēnei kiriata i te whakaakona o Te Whai Tāke, Kia Tika!
Te Tātai Ahumoni
E hāngai pū ana tēnei rauemi ki te marau Pāngarau o te marautanga TMOA hou, ā, he mea hoahoa kia whaitake te pānga ki te hōtaka pāngarau whānui.
Ka whakamahi ngā mokopuna i ngā kaupapa me te mātauranga pāngarau nō Tūārere 3 me te Tūārere 4 o te wāhanga ako o te Pāngarau ki te whakaoti i ngā rapanga huhua. Ka nanao atu ngā akoranga ki ngā ariā motuhake nō Te Tātai, me ngā hononga āpiti ki Te Taurangi me te Āhuahanga, Te Tauanga me te Tūponotanga, me Te Ine.
Ngā rauemi tāke
Ko tā Te Whai Tāke, Kia Tika he whakarato i te āheinga ki ngā rangatahi ki te ako i te āhua o te tāke i Aotearoa, ahakoa he kaimahi anamata ia, he kairakahinonga, he kaikirimana rānei. Ka aro tēnei kaupapa ki te pūnaha tāke me te whakapiki i te māramatanga o te take e tāketia ana tātou, ā, he pēhea te āhua o tāke.